أولا: المكونات (بس مش دقيق وسكر ولبن و........) لأ دى 1- سيراميكة المقاس المتوفرعندكم كبيرة أو صغيرة مش مهم المهم إنها تكون سادة أو ذات رسوم خفيفة وألوانها هادية علشان ماتغطيش على الرسمة بتاعتنا أو قطعة من الزجاج الغير جارحة من الأطراف علشان ماتجرحش إيدكم 2- ألوان الرسم على الزجاج مش ألوان الرسم على السيراميك علشان النتائج تكون أفضل 3- رملة ناعمة (منخولة يعنى) 4- زلط صغير جدا أد حباية الحلبة الناشفة (علشان الحلبة المبلولة بتبقى كبيرة و منفوشة فمش عايزين نصب) هتقولولى نجيبة إزاى .. إما إنكم بعد ما تنخلو الرمل ممكن تلاقو الزلط ده ..وإما تجيبو شوية (طبق كده) من التراب وتنقو منه الزلط ده (عارفة إن الموضوع شاق جدا بس والله النتيجة تستاهل التعب) 5- غرى أبيض (غراء-اللى بيلزقو بيه الخشب بس أبيض) 6- رليف (وهو عبارة عن أنبوبة مثل أنبوبة المرهم بس لها بوز رفيع وطويل) ومتوفرة بألوان كتيرة حسب الرغبة بس الأفضل فى الموضوع بتاعنا هو اللون ( الإسود - الدهبى - الفضى ) 7- 2 فرشات رسم واحدة رفيعة شوية علشان تلون الرسمات الدقيقة والرفيعة والصغيرة وواحدة متوسطة للطلاء والدهن 8- سلاكة أسنان (خلة) وقطعة خشب مثل القلم الرصاص (ممكن تاخدو حتة طول الصباع من عصاية أفص ...(شوفتو أنا متعاونة إزاي وبجيبلكم حل لكل حاجة) 9- الرسمة اللى عايزينها (بنت-قطة-دب-رسمة زخرفية.....)أى حاجة تحبوها أونرسم إحنا لو رسمنا كويس.. ثانيا: الطريقة: نجيب السيراميكة أو الزجاج ونلزق عليها الرسمة وتحتها ورقة كربون نلزقة بسوليتب ونمشى على الرسمة كلها ونحاول ماننساش حاجة منها علشان بعد مانشيل الرسمة هيبقى صعب تكملة الناقص بإتقان (نصيحة: ممكن نصور الرسمة اللى عايزينها علشان الأصل يفضل معانا من غير مايتشوة من الدوس عليه بالقلم أكتر من مرة وكمان ممكن نتحكم فى المقاس بتاع الصورة على حسب السيراميكة اللى عندنا (وطبعا السيراميكة دى هتكون من اللى فاضل بعد تبليط الشقة) بعد ما نشيل الرسمة والكربون نمشى على الخطوط بلرليف بإننا نحط البوز بتاع الأنبوبة على الخط ونضغط عليها شوية شوية مع سحب الأنبوبة مع الخط هنلاقى اللون خرج ومشى على الخط ونخلى بنالنا إن إيدنا ماتجيش على اللى مشينا عليه علشان مايبوزش ولما نخلص الرسمة كلها نسيبها شوية تنشف وبعدين نقرر الأجزاء هيكون ألوانها إيه ..... وكفاية عليكو كده دلوقتى علشان الحلقة اللى جاية هأحاول أحطلكو صور للنماذج اللى هنتكلم عنها .. ياريت تتابعو الموضوع علشان هو لحد كده ده الطبيعى فى الرسم على السراميك والزجاج لكن اللى جاى هو المهم وهو المبتكر اللى بيدى النتيجة اللى بحكيلكم عليها ...
الرسمة دى عادية جدا بس بإضافة الشعر للقطة أعطت شكل أجمل لمقاربتة للواقع وكمان أعطت ملمس جميل
من الممكن لكل واحد إضافة الشئ اللى هو عايزه وشايف إنه هيدى شكل أجمل للرسمة يعنى ممكن حد يلبس الدب بنطالون جينس بإستخدام القماش الجينس أو حد يغطى جسم القطة كله بالفرو مع مراعاة إن كل قسم يتقص ويتلسق لوحده علشان ماتداريش على التحديد وتدى مصداقية للشكل بس ده هيتطلب منك مضاعفة تخانة التحديد أو الريليف علشان يبان من الفرو
وممكن نحط صورة فى القلب أو فى جزء منه
والشعر اللى إستخدمتة ده فروة أرنب بعد تجفيفها
كان ممكن ما نستخدمش القلب القطيفة ده ونخليها ساده ونضع صورة فى القلب ويبقى برواز ونزوقه بطريقه تانيه
طبعا الخامات المستخدمة دى حاجات عندى فى البيت مش عيزاها زى الفيونكة الحمراء دى كانت ملسوقه على توكة ووقعت
حب اللولى ده كان عقد و إتقطع بس بإستخدام قصافة الحديد ((اللى هى زى البنسة أو الزرادية كده بس طرفيها بيقصو زى القصافة بتاعت الأظفر لكن دى بتقصف الأسلاك الحديد وما شابه)) ووضعت حبة اللولى على طرفى القصافة من عند الأخرام وضغط عليها ببطء حتى لا تتكسر فتنقسم الى نصفين وبإستخدام الغراء الأبيض لسقت الأنصاف كما أريد .. أرسم بها أو أكتب زى ما أنا عاوزة
